Nigeria ruling All Progressives Congress (APC) party go begin primary election for govnorship candidates inside different states for di kontri on Sunday.
APC don already clear Kaduna state govnor, Nasir El-Rufai, plus Kano Abdullahi Ganduje and Kebbi Abubakar Bagudu.
But na dia di awoof finish, for some states sign say action movie go happun don full evri wia.
Akinwunmi Ambode Fit Dey Inside Hot Soup For Lagos As 2019 Election Dey Road
Lagos state: Govnor Ambode dey look im back
For Lagos, na two candidates dey contest di party primary afta di third pesin, Dr. Femi Hamzat waka comot.
Babajide Sanwo-Olu and current Lagos state govnor, Akinwunmi Ambode go battle diasef and di prize na Lagos, di heavyweight state for di kontri.
Since 1999, evri govnor for Lagos don serve two-two term, but dis time dat one fit change as di tori wey full ground be say di govnor and leader of di party, Asiwaju Bola Tinubu no dey see eye to eye.
Govnor Ambode don tok say e no true im and Tinubu, wey tori pipo don report say dey support Sanwo-Olu, get any quanta.
But as 36 out of di 40 lawmakers for di state House of Assembly don troway support give Babajide Sanwo-Olu as dia captain, Ambode fit dey face relegation true true.
Rivers: Tonye Cole or Magnus Abe, na who go challenge Wike?
Di National Working Committee for APC don clear four candidates to contest di govnorship primaries for Rivers State wey include Tonye Dele Cole, Sen. Magnus Ngei Abe, Dumo Lulu Briggs and Dr. Dawari George.
Tonye Cole na international businessman, Dr. Dawari George na former commissioner for di state and im bin don be member for House of Representatives while Dumo Lulu Briggs na popular philanthropist wey don do beta tins for many communities for Rivers state and Niger Delta.
Tonye Cole, Dumo Lulu Briggs and Dawari George tanda for di Amaechi faction of APC for Rivers State and na for di Kalabari speaking riverine area for di state dem from come.
For dis election, di leader of APC for Rivers state and Minister of Transportation, Rt. Hon. Rotimi Chibuike Amaechi don say di next govnor of Rivers State suppose come from di riverine areas as na di upland pipo don be govnor for di state since 1999.
Since all four candidates na riverine pipo dem be, dem get equal chance to gbab di govnorship flag for APC.
Imo state own too go tie rapper
APC don clear Senator Hope Uzodinma, Prince Eze Madumer, Jude Ejiogu, Barr. Chima Anozie, Dr. Chris Emenike Nlemoha, Eche George Ezenna, Chukwudi Celestine Ololo, Air Commodore Peter Gbujie and Hon. Uche Nwosu for Imo State race to be govnor.
Current govnor Owelle Rochas Okorocha don anoint im chief of staff Hon. Uche Nwosu as im heir.
Di wahala be say some pipo no want Nwosu as future govnor because im be son-in-law to Rochas wey mean say, di outgoing govnor go get im ear.
Di oda reason unto say di two men na from di same Imo West Senatorial district dem from come and since some APC members wan zone di govnor office to anoda senatorial district, who go wear di crown don become fight to finish.