Di election committee wey suppose conduct di primaries of di All Progressives Congress (APC) for Lagos State say di election neva hold.
From 8am on Tuesday, thousands of di party supporters bin come out to vote for dia candidate for different wards for di state. tori pipo wey full ground, cari eye see say voting happun and even di national leader of di party Bola Tinubu come out vote. But di election committee say all dat one na waste of time.
Di chairmo of di committee, Chief Clement Ebri wey tok to tori pipo around 4:20pm on Tuesday, say dem don ready to do di election.
“We bin do meeting wit those wey dey involved on Monday and di National Working Committee say make we make some kain adjustments,” im tok.
“Anytin wey dem do witout di list wey we suppose use do di election…we do meeting wit representatives of di two candidates as at 8am on Tuesday morning.
Dat one fit explain why Govnor Akinwunmi Ambode no come out to vote for di primaries for im ward for Epe.
Govnor Ambode and Babajide Sanwo-Olu dey drag diasef to win di ticket of dia party for Lagos State, di heavyweight state for Nigeria.
Lagos state: Govnor Ambode dey look im back
Since 1999, evri govnor for Lagos don serve two-two term, but dis time dat one fit change as di tori wey full ground be say di govnor and leader of di party, Asiwaju Bola Tinubu no dey see eye to eye.
Govnor Ambode don tok say e no true im and Tinubu, wey tori pipo don report say dey support Sanwo-Olu, get any kwanta.
But as 36 out of di 40 lawmakers for di state House of Assembly don support Mr Sanwo-Olu as dia captain, Ambode fit face relegation true true.
– Babajide Olusola Sanwo-Olu go vote for St. Stephen’s primary school, Adeniji Adele, Lagos Island.
– Govnor Akinwunmi Ambode go vote for Recreational Centre for Epe.
Party ID cards don ready but na for voting centre dem go distribute am.
One APC member tell Tok say officials dey give members wey no support ‘dia candidate’ problems – dem go say dem no fit find dia card.