For tori wey just enter street now, we hear say Lagos State police command don burst yansh of Oga of popular notorious cult group, Badoo.
The Lagos State police command nab the Badoo cult chief priest wey hin name be Fatai Adebayo wey everybody sabi as Alese.
Dem don win lotto with this guy wey dem catch because the guy don dia wanted list tey tey.
Public Relations Officer for the command, Chike Oti , talk for statement say Adebayo, 34, get special talent to dey make members of hin group swear say dem no go fu*k up before dem go any mission.
Police nab am for hin shrine wey dey Imosan Village, wey dey around ijebu ode, Ogun State.
One of the guys wey dem catch talk say before dem go for any operation, dia own Oga go carry all of dem come meet this man (Adebayo) make dem swear first… And dem no go go any mission if dem no swear first.
The address of the shrine na No 38, Ayegbami Quaters, Imosan and wen police reach dere, dem dismantle the whole place. Na so so juju full everywhere.
This Badoo group don kill kill many people for Lagos especially for ikorodu.
More investigation still dey go on, and more tori go reach una hear as we get am…
This 2018 be like say na make sense year because na so so good news we dey hear.