The National Chairman of People Democratic Movement, wey hin name be Chief Frank Igwebuike don tell Presidential Election Petition Tribunal say make dem comot hin party from the petition wey dem get against President Muhammadu Buhari on top the February 23 presidential election.
He tok say hin party don look the matter again o and the chance wey dey for dem to win the matter no dey at all, so e better make dem comot hin party from the petition.
But the thing wey com happen be say the PDM presidential candidate wey hin name be Pastor Aminchi Habu and some of the people wey dey for dia National Working Committee don kanta wetin Igwebuike talk. Dem tok say the party go still dey for the matter until dey see wetin go end am.
The National Secretary of the party con talk say the Chairman wey be Igwebuike no get the power to comot dia party for the matter, he tok say na the National Working Committee wey dey for the party fit tok am.