Soldiers wey dem de work with Operation Delta Safe (ODS) wey be one Joint Task Force for Niger Delta don confirm on Friday say one bad boy wey be senior militant, Oyawerikumor Peregbabofa wey dem de call Karaowei for creeks de for their hand but dem com kill am wen dem ambush dem for one forest wey de Bolu Ndoro for Bayelsa state.
The senior militant wey na him be oga kidnapper wey gbab one oyibo pastor wey from London, Ian Squire for Enekorogha for Delta state enter Army trap on Thursday morning for Ogbobagbene.
Tori com say some of the militant boys as dem hear am com set trap for soldiers and ambush dem as dem carry the senior militant de go. For that level na him all of them begin de shoot diasef and na from there wey dem com kill Karaowei after him try to escape from the soldiers dia hand.
JTF say before them kill am say him been don talk plenty how him de kidnap de kill people for Niger Delta side and even thief-thief. Dem come say na him carry dem go where him de give him gun and other weapon and him even tell some of him boys say make dem no do militant work again.