‘If true-true Donald Trump call Buhari ‘lifeless’ di whole world go judge’, Nigeria goment on Monday reply tori for town say America presido bin yab di kontri presido.
Information Minister Lai Mohammed tell BBC say ‘na season of fake news we dey so and I wan believe say dis na fake news, but if true-true say President Trump tok am, di whole world go judge di mata’.
‘Sake of say e dey clear to di world say im make statement dey praise Presido Buhari dey encourage am to fight corruption.’
Tori be say breeze blow Monday morning open wetin American president tok for secret about Nigerian president wen Financial Times tori pipo report say ‘America presido, Donald Trump bin tell pipo wey dey work wit am say e no ever wan to meet wit someone wey dey lifeless like Nigerian presido Muhammadu Buhari’.
Dis informate na according to three pipo wey dey familiar wit di mata afta di first time Presido Buhari meet wit Presido Trump for April.
Latest tori be say Oga Trump go soon welcome Kenya President Uhuru Kenyatta to White House later on Monday to discuss trade and security.
“Trump like chemistry, Africa neva reach dis high for im radar but if e like you e go find way to make tins work.” – Na wetin one pesin wey dey in contact wit US and Kenya officials wey dey prepare for Monday meeting tell Financial Times.